Testi 'U curaggiu di li pedi - Olivia Sellerio

'U curaggiu di li pedi

Talìa, ca l’avi dintra all’occhi
L’addiu e 'i jorna darreri
Gaggia ca lu cori l’arrocca
Curaggiu di li pedi
E l’avi dintra all’ossa
Talìa, nun ti nn’adduni?
Sutta a li passi s’arrussa
La rina di li duni
Rosa di petra e ventu
Ciuri d’u tempu, arrivilassi 'a via!
Talìa, tribulu di cruciati
Talìa, chiaia ca linzìa
Murgana di lu desertu
Sciogghi la so malìa
Marusu c’arrivota
E lìa alichi e manu
Talìa, l’avi nell’occhi pirduti
E talìa luntanu
Milli e migghiara 'i sorti a scarrucciari
Farisi lacrima e poi sali
E 'nta li mori amari
L’amu a amari l’omu a mari
Ca 'nta li mori amari semu a mari
E 'nta li mori amari
L’amu a amari l’omu a mari
O 'nta li mori amari amuri mori
Fuju e sapi d’unni veni
Fui iu c’un ci spiavu!
Fuju, tannu com’un lu vidìa?
E ora è ccà, talìa!
Occhi d’alivi, 'u vidi? Denti di nivi
Vivi lacrimi e surridi
E 'nta li mori amari
L’amu a amari l’omu a mari
Ca 'nta li mori amari semu a mari
E 'nta li mori amari
L’amu a amari l’omu a mari
O 'nta li mori amari amuri mori
E 'nta li mori amari
L’amu a amari l’omu a mari
O 'nta li mori amari amuri mori